Monday, April 5, 2010

إنتى وانا


بنام ع الأرض
ف الأوضه الفاضيه
اللى ملهاش جدران

مبحبش دوشة الفرجه المستخبيه ورا الزمن
ولا الحاجات

***

ساعات
الحزن
بيبأه ليه ملامح الواد الوسيم فى تايتنك
يفرد دراعات البنات
يفتح دواليب أرواحهم
ويئيس جناحاتهم
ويزؤهم من فوء المراكب العاليه
وعنيه ع السما

***

البنت دى عيطت كتير
واما بصيت ف عنيها
شفت اسكندريه
مبلوله
والمطر
بيتلفت من بعيد
وبيمشى زى الطاووس

***

تعرفى؟
ساعات
بحس انى لسه واصل من كهف بعيد أوى
ولما أبصلك
بيتهيألك انى بتفرج عليك
مبتحبيش تسدئى انى غرآن فى الفرجه على نفسى
كمان مبتاخديش بالك من روحك
لما بتتكسفى تحضنينى
فتدعكى ف عنيك بصوابعك
!وتكلمينى بشجن عن المرايات

8 comments:

Ms Venus said...

البنت دى عيطت كتير
واما بصيت ف عنيها
شفت اسكندريه
مبلوله
والمطر
بيتلفت من بعيد
وبيمشى زى الطاووس


اشمعنى اسكندرية يا انتخ

علشان البحر اللى ياما بيشيل همومنا


نروح كده نقعد قدامه ونشكى له وهو يشيل

وعمره ما قال لا ولا اعترض ولا حتى حسسنا انه تعب مننا

أنتخ said...

مس فينوس الجميله

ماهوانتى كاسكندرانيه أولتى تفصيله واحده من تفاصيل كتير أوى
ويمكن بؤول يمكن مبتاخديش بالك
إنك لما بتخلصى وشوشتك للبحر بترجعى تعملى بحرك الخاص جوه اسكندريه... اسكندريه البحر ...اسكندريه الوسع

إسكندريه يامس بحر جمب البحر
بموت فى الغرأ فى ألبه

بس حابب أؤوللك ان ده مش هوه وبس ردى على سؤالك -اشمعنى اسكندريه اسمحيلى بس افكرك باعتبارك معنيه بالفن
بنكتب أو بنرسم بذاكره مركبه شويه مش سهل نفسرها وبيتهيألى مش لازم

أصدى بفهم العالم بحسى والفن يتهيألى لغة حوار حس مع حس

إيناس حليم said...

أنتخ
قد ايه الخاطرة دي جميلة ولمستني اوي
على فكرة انت بتكتب عامية حلوة وقريبة من القلب وتعبيراتك فيها مش مستهلكة..

لا فعلا عجبتني اوي، تسمحلي احتفظ بيها على جهازي؟؟

بس عندي ملاحظة.. لما تيجي تكتب كلمة بتتنطق كألف بالعامية وهي في الفصحى بالقاف المفروض تتكتب بالقاف
زي: وائف= واقف
يئيس= يقيس
فوء= فوق
تسدئى= تصدقي
غرآن= غرقان

ومتخافش القارىء وهو بيقراها هيبقى عارف انه بيقرا عامية وهيقراها بالهمزة لكن هي بتكتب قاف..

وتحياتي بجد يا انتخ على الحالة الحلوة دي

أنتخ said...

فرحنى انك اتبسطى
انك لسه بتطلى
طيب
أنا حابب استرسل وياك ف موضوع العامية وكتابتها
أ س ت ر س ل
وليه يا جميل طالما هنؤول بالعاميه منكتبهاش زى م بننطأها
إذا اتفأنا انها صيغة تواصل خاصة
ليه نحملها ع الفصحى وكتابة الفصحى ليه متستقلِش للآخر
...
مش محتاجه استئذان يا مبدعه دا شرف كبير أعتز بيه

بس لو تسمحى
خلى أولها كده

بنام ع الأرض
ف الأوضه الفاضيه
اللى ملهاش جدران
مبحبش دوشة الفرجه المستخبيه ورا الزمن
ولا الحاجات

قهوة بالفانيليا - شيماء علي said...

عجبتني اوي دي
اول مرة أقرالك حاجة شفافة كدة و مليانة حنية :)
مع ايناس في رأيها ان التعبيرات جديدة و مش مستهلكة
:)

أنتخ said...

رأيك فرحنى يا شيماء

أسما عواد said...

أنتخ
أنا دورت في القديم
زي ما دورت انت عليا
ولسه هفضل أدور فيه عشان أعرفك أكتر
بوست جميل جدا وشفاف
هو انا باخد بس وقت لغاية ماأترجمه للفصحى في مخي الضيق
العيب موش في العامية
العيب فيا انا اللي باخد وقت على ما بفهمها
ولكن المرة دي لقيتها جميلة عندك
فيها احساس عالي
شكرا لزياراتك الجميلة والداعمة
تحياتي ويا رب الكتاب يكون عجبك

أنتخ said...

المبدعة الجميلةأسماء
شكرا لمتابعتك اللى بعتز وبتشرف بيها
دمت دايما بإبداع راقى